تعليقي على برنامج الطيارة في قناة التاسعة

وقتلي العايلة تبدا ملمومة بعد شقان الفطر و يحلو قناة بدات البث حديثا يلقاو رواحهم يتفرجوا في برنامج اسمو الطيارة، الي في كل حلقة عندهم ضحية و متسمع كان التهريج و الصياح، مسكين يخوفوه و ويركبولو الرعب و هو يعلم بيه ربي عندو السكر ولا الدم ولا يخاف مالطيارا، و في اللخر يشكروه على المشاركة في البرنامج ويقولولو العبرة بالمشاركة.

 هذا في عوض يعتذروا منو و يعوضوه على وقتوا لضيعوا و هو فيبالو باش يدعم السياحة الداخلية، في الخر هوما يربحوا الفلوس على حساب مشاعر الناس و وقتهم. 

إنطلاقا من فكرتو انو الإعلام هو سلطة رابعة و يصنع الرأي العام، البرنامج هذا من ناحية يدعو للعنف و الكذب و اهدار الوقت، و زيد ثبت في الشخصيات لي خطروها باش يحطوها في الفخ: تره قلي بخلاف رجال السياسة والإعلاميين و الفنانين، يعني بخلاف المشاهير قال شنو فمش مثلا مواطن بسيط و عالم ؟ بالطبيعة لا، هاذوكم معندهمش إعتبار. يا خسارتك يا مورو كيف شاركت في البرنامج بملء ارادتك بعد ما حصلوك، متفكرتش الحديث القايل لا يحل لمسلم أن يروع مسلما.. 

مع الأسف في دنيا المال كل شي يولي جايز و لا مكان للقيم. ملاحظة إذا طلعونا مرة جديدة برنامج هكا و شنوة قلو لاخر التمساح، أحسن حل لمقاطعة أمثال هاته البرامج التافهة  هو بكل بساطة عدم مشاهدتها، يعني كيف شركات الإشهار تعمل إحصائيات و تلقا لبرنامج مش يتبعوا فيه برشة تو تهز يدها عليه و نرتاحو ..